Google Meet

Hannah A. Leceña

Naalimungawan si Karen tungod sa sininggitay sa sulod sa ilahang panimalay. Naglalis na sab ang iyahang ginikanan. Pagbuklat sa iyahang mata, sakit na ang init sa adlaw nga mibanda sa iyahang nawung.

“Gago ka! Muoli lang ka diri kon wala na kay kwarta!” singhag sa iyahang inahan nga si Estrella nga tua nagdigamo sa ilahang abuhan. Sa hunahuna ni Karen, niabot na pod tingali ang iyahang amahan arun mangayo og bugas. Makahinumdom ra man god intawun kini og uli sa ilahang balay kon wala na kini pagkaon sa boarding house niini. Magtulo ka tuig na nga nagbuwag iyahang inahan ug amahan. Labandera lang ang iyahang inahan.

Pagbakod ni Karen nadunggan niya ang tingog sa motor sa iyahang amahan pahawa sa ilaha. Paggawas niya sa iyahang lawak, tua iyahang inahan nga nagtuk-ong sa purtahan ug nanigarilyo. Sa pagkakita niini sa iyaha, mitindog dayon kini ug naghukad dayon og iyahang pamahaw.

“Maayo kay nimata na ka!” segun niini.

“Ang imuhang amahan—” yawyaw na sab sa iyahang inahan. Wala na panumbalinga ni Karen ang gipangwakal niini. Miadto siya sa kasilyas arun mangihi dayon naghilam-os. Gitan-aw niya ang iyahang dagway sa gamay nilang samin. Wala pa siyay panudlay. Wala pa pod siyay ligo. Iyahang gibugkusan iyahang taas nga buhok. Iyahang gisul-ob iyahang bra kay namatikdan niya nga klaro kaayo ang atngal sa iyahang dakong totoy. Pagtan-aw niya sa iyahang selpon alas otso traynta na.

Dali nga miadto si Karen sa iyahang kwarto. Late na pod siya sa iyahang klase. Nakapangalot siya sa iyahang ulo. Gikapoy pa gyod intawun iyahang tibuok kalawasan tungod sa iyahang kalaki kagabie. Dugay kaayo siya natuwog kay naghimu na sab siya og milagro. Daghan pod baya og views iyang bidyu. Maayo na lang gyod gitudluan siya sa iyahang klasmeyt kon unsa ang himuon arun makakwarta online. Giabrihan ni Karen iyahang laptop. Tingalig masuko na gyod iyahang propesor tungod kay permente na lang siya maulahi og sulod sa Google Meet. Usahay man god mawad-an siyag gana. Usahay mawala-wala pa gyod siya inig mataymingan nga walay signal ilang WiFi. Usahay dili na lang gani siya mosulod.

Mipuwesto siya dapit sa bintana. Iyahang gitabunan kini og tela arun dili makita ang ilahang bungbong nga kalakat. Gi-on dayon niya ang iyahang second hand nga WiFi.

“Pisti!” Nakaingon siya sa kaugalingon. Tungod aning new normal naglisud hinuon siyag tuon ug gukod sa ilahang mga leksyon. Morag impyerno na sab iyahang panan-aw sa sulod sa iyahang lawak.

First year college na si Karen sa usa ka tulunghaan sa lungsod. Apan anaa ra siya sa ilahang baryo nagpuyo. Dili pa man sila ka-face to face sa klase tungod kay pandemic pa man. BS Fisheries iyahang gikuha nga kurso. Dili tungod kay gusto niya. Aquaculture man god ang offered nga specialization sa eskuylahan sa ilahang lugar. Wala nay lain. Mao na lang pod iyahang gipadayon. Kalouy sa Ginoo nakasugakod man siya hangtud sa second sem. Naglisud siya una-una pero maayo na lang masinabtanon ilahang mga propesor ug matinabangon iyahang mga klasmeyt nga sa online ra pod niya nailaila.

Miginhawa siyag lawum sa pagkakita nga kulay green ang signal sa iyahang WiFi. Maayo na lang. Iyaha kining gibutang pa sa igbaw arun makakuha gyod og mas kusog nga signal. Niadto dayon siya sa iyahang email account arun mosulod sa Google Meet. Pila ka minuto ang milabay nakasulod na siya sa ilahang Google classroom.

Nakita dayon niya ang nawong sa ilahang maestro nga kaganiha pa diay naglektyur ug ang message sa iyahang mga klasmeyt nga nag-greet og good morning sa ilahang propesor sa group chat.

Nagchat dayon sa iyaha ang klasmeyt nga si Erica.

“Huy, Kar, musta? Nag-exhibition na sab ka gabie no?!” pangutana niini sa iyaha.

“Gaga! Huy Day, salamat ha! Nakuha na nako ang return of investment pero wa pa nako na pa-in cash hahahahaha!”

Nagreply ang iyahang klasmeyt, “Way sapayan Day oy, kabalo ko nga kinahanglan gyod nimu ang dats,” matud pa niini.

“Uy Day, humanag attendance si Sir ganina. Pero ingna ra nga na-late ka makasabot man na,” dugang pa niini.

“Oki oki. Tnx,” reply niya.

Sa dihang gapaminaw siya sa lecture sa iyahang maestro sa Botany, adunay nanuktok sa iyahang kwarto. Iyaha dayon gi-off iyahang kamera.

Iyahang giabrihan ang purtahan.

“Kaon na” agda sa iyahang inahan, aduna kini dala nga usa ka plato nga napuno og kan-on ug usa ka lugas nga tamban nga buwad.

Gikuha ni Karen ang plato ug gisirad-an dayun pagbalik ang purtahan sa iyahang kwarto.

Dali siya nga mibalik sa iyahang pwesto. Gi-on iyahang kamera. Timing pag-on sa iyahang kamera, gitawag siya sa iyahang propesor.

“Karen Dominggo.”

Nakulbaan siya sa pagkadungog sa iyahang pangalan. Gi-on dayon niya iyahang microphone.

“Yes Sir,” tubag niya.

“What is ecological balance?” pangutana sa iyahang maestro.

Wala dayon makatubag si Karen. Apan maayo na lang kay nagtext iyahang klasmeyt nga si Erica. Gitagaan siya og answer niini.

“Ecological Balance means balance of the ecosystem, organism, ferns, and other living things.”

“Okay, Miss Karen,” tubag sa iyahang maestro. Nakita niya nga nagngisi kini ug mitan-aw dapit sa iyahang dughan. Nakaingun siya sa kaugalingon nga pare-pareho lang gyod diay ang tanan laki sa kalibutan.

“Other answers?” dugang pangutana niini sa iyahang ubang klasmeyt.

Nagpost og comment ang iyahang mga klasmeyt sa chat. Ang uban niya nga klasmeyt nga mga utukan kaayo daghan og pangutana sa chat. Gi-off ni  Karen iyahang mic ug iyahang cam. Nakaingun siyag bahala na god kon tres iyahang grado. Makapasa ra man gihapon.

Taud-taod nahuman na gyod ilahang klase. Nalipay si Karen kay makakaon na gyod siya. Ganiha pa nagkutoy ang iyang tiyan. I-off na unta niya ang iyahang laptop arun mobalik sa pagkatuwog. Apan nakadawat siya og usa ka chat. Paglantaw niya, gikan kini sa usa ka lalaki nga wala niya mailhi.

“Hello Karen,” segun sa lalaki sa iyaha.

“I saw your videos,” matud pa niini.

“I want you,” dugang pa niini ug gisend ang screen shot sa iyahang dagway.

Wala kalihok si Karen sa iyahang gilingkuran. Nangluspad siya sa pagkakita sa iyahang hulagway. Wala siya makabalo kon giunsa pagkabalo sa lalaki sa iyahang mga binuhatan. Taga-ubang nasud man ang subscriber sa iyahang account ug lahi iyahang pangalan nga gigamit. Apan naunsa mang pagkaunsa-a nga nahibal-an iyahang tinuod nga identity?

“Still there?” dugang pa niini.

“Bahala na. Online ra bitaw ni. Online ra,” sulti niya sa kaugalingon samtang naghungit og kan-on inubanan sa buwad nga tamban nga gihukad sa iyahang inahan. 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s